Salaam khaak nasheenon pe sogwaaron ka
Salaam khaak nasheenon pe sogwaaron ka
Ghareeb dete hain pursa tumhaare pyaron ka
Salaam unhein jinhein sharm khaaye jaati hai
Khule saron pe aseeri ki khaak aati hai
Salaam uspe jo zehmat kash-e-salaasil hai
Museebaton mein Imaamat ki pehli manzil hai
Salaam bhejte hain apni shehzaadi par
Ke jisko saunp gaye marte waqt ghar Sarwar
Musaafirat mein jisey be-basi ye dikhlaayi
Nisaar kar diye bachche na bach sakaa bhai
Aseer ho ke jise shaamiyon ke narghey mein
Hussainiyat hai sikhaana Ali ke lehjey mein
Sakina bibi tumhaare ghulam haazir hain
Bujhe jo pyaas to ashqon ke jaam haazir hain
Ye sin ye hashr ye sadme naye naye bibi
Kahaan pe baithi ho khaime to jal gaye bibi
Pahaad raat badi der hai savere mein
Kahaan ho shaam-e-ghareebaan ke ghup andhere mein
Zameen-e-garm yateemi ki sakhtiyaan bibi
Wo seena jis pe ke soti thi ab kahaan bibi
Janaab-e-maadar-e-besheer ko bhi sab ka salaam
Ajeeb waqt hai kya de tasalliyon ke payaam
Abhi kalejey mein ek aag si lagi hogi
Abhi to goad ki garmi na kam hui hogi
Nahin andhere mein kuchh soojhta kahaan dhoonde
Tumhara chaand kahaan chhup gaya kahaan dhoonde
Na is tarah koi kheti hari bhari ujrhi
Tumhari maang bhi ujrhi hai koakh bhi ujrhi
Nahin laeenon mein insaan koi Khuda hafiz
Darinde aur ye bevaarisi Khuda hafiz
Shareek-e-haq ke durood-o-salaam-e-paighambar
Salaam Sayyed-e-lolaq ke lutey ghar par
Salaam tum pe rasool-o-batool ke pyaaro
Salaam mehr-e-Imamat ke gird sayaaro
Salaam mohsin-e-Islam khasta tan laasho
Salaam tum pe shaheedon ke be-kafan laasho
Bachey to agley baras hum hain aur ye gham phir hai
Jo chal basey to ye apna salaam-e-aakhir hai